धरान उपमहानगरपालिकाका मेयर हर्क साम्पाङको नेतृत्वमा सञ्चालन हुँदै आएको “Harka Sampang: A Revolution” अभियान अब विदेशमा समेत फैलिन थालेको छ। सोही अभियानअन्तर्गत दक्षिण कोरियाको राजधानी सिओलमा पहिलो संगठन निर्माण कार्यक्रम सम्पन्न भएको छ।
“चेतना र पसिना, औजार र विचारको क्रान्ति” भन्ने नाराका साथ अघि बढाइएको अभियानको कोरियास्थित संगठन गठन कार्यक्रम पूर्वी नेपाल समाजको सभाहल, दोङ्देमुन गेट नं. ३ मा आज (अक्टोबर ६) विशेष रूपमा सम्पन्न भएको हो।
कार्यक्रममा विभिन्न क्षेत्र र सहरबाट श्रम, सेवा र राष्ट्रिय भावना बोकेर आएका नेपालीहरूले “हामी जुट्ने छौं, हामी उठ्ने छौं, श्रमको पसिना बगाउने छौं” भन्ने उत्साहका साथ सहभागिता जनाएका थिए।
कार्यक्रममार्फत चन्द्रहाङ राईको नेतृत्वमा २१ सदस्यीय कार्यसमिति सर्वसम्मत रूपमा चयन गरिएको छ।
नवनिर्वाचित कार्यसमिति:
• अध्यक्ष: चन्द्रहाङ राई
• वरिष्ठ उपाध्यक्ष: सुवास चन्द्र योङहाङ
• उपाध्यक्ष: प्रदिप राई, भिषण चेम्जोङ
• सचिव: दित्सन राई
• सह–सचिव: दुर्गा चेम्जोङ
• कोषाध्यक्ष: सकुन्तला राई
• सह–कोषाध्यक्ष: सुनिल साम्पाङ राई
• प्रवक्ता: हेम बा आले
• सदस्यहरू: भवानी विक्रम नेम्बाङ, चन्द्र प्रसाद राई, मोहन कुमार राई, मिङमा छेदन, सम्भु साम्पाङ राई, विधान राई, खगेन्द्र सम्भाफे, शन्तोष राई, सगेन लिम्बु, विजय सागर सुब्बा, नरेन्द्र शेर्मा, विवेक लिम्बु
हालसम्म धरानमा सीमित अभियानलाई अब प्रवासमा पनि विस्तार गर्दै “हर्क साम्पाङ रेवोलुसन”ले कोरियालाई पहिलो गन्तव्य बनाएको छ। आयोजकका अनुसार, कार्यक्रम पहिलो पटक भए पनि उल्लेख्य भीड र जनउपस्थिति देखियो। सभाहल सानो भए पनि आन्दोलनप्रतिको जनभावना र उत्साह ठूलो थियो।
कार्यक्रममा उपस्थित श्रमजीवी नेपालीहरूले जात, धर्म, वर्ग, भौगोलिक सीमाभन्दा माथि उठेर एकताको सन्देश दिएका थिए।
सङ्गठनका पदाधिकारीहरूले कोरियामा रहेका सबै नेपाली श्रमिक र युवालाई **‘जय श्रमदान’**को नारा सहित अभियानमा सहभागी हुन आह्वान गरेका छन्।
कार्यक्रमले कोरियामा रहेका नेपालीबीच श्रम र एकताको साझा भावना जगाउने काम गरेको छ। वक्ताहरूले “सयौं थुँगा फूलका माला”जस्तै सबैलाई समेट्ने भावनासहित सुखी, समृद्ध र स्वावलम्बी नेपाल निर्माणमा प्रवासी नेपालीको भूमिका महत्वपूर्ण हुने बताएका थिए।
अन्त्यमा उपस्थित सबैले नयाँ कार्यसमितिलाई बधाई दिँदै सफल कार्यकालको शुभकामना व्यक्त गरेका थिए।
