विपिन कुमार गुरुङ अध्यक्ष रहेको गैर आवासीय नेपाली संघ राष्ट्रिय समन्वय परिषद् (NRNA-NCC) दक्षिण कोरियाले पहिलोपटक नेपाली श्रमिक र विद्यार्थीका लागि ‘हेल्प डेस्क’ सञ्चालनमा ल्याउने भएको छ।
विपिन कुमार गुरुङको नेतृत्वमा निर्वाचित एनआरएनए दक्षिण कोरियाको नयाँ कार्यसमितिले निर्वाचनको चार महिनाभित्रै यो सामाजिक कार्यको सुरुवात गर्न लागेको हो।
हेल्प डेस्कको औपचारिक उद्घाटन कार्यक्रम आउँदो अगस्ट १७ आइतबार, सउलको दोङदेमुनमा दिउँसो ४ बजेदेखि ५ बजेसम्म हुनेछ। त्यसपछि उक्त डेस्कले नियमित सेवा दिन थाल्नेछ।हाल दक्षिण कोरियामा नेपाली श्रमिक तथा विद्यार्थीहरूको संख्या तीव्र रूपमा बढ्दो छ। उनीहरूले कामको थलो, अध्यापन, स्वास्थ्य, भिसा, कानुनी समस्या लगायतका विभिन्न जटिलता भोग्नुपरेको छ। ती समस्या समाधान गर्न संस्थागत र समन्वित रूपमा यो हेल्प डेस्क सञ्चालनमा ल्याउन लागिएको हो।
यस अभियानमार्फत एनआरएनएले कोरियाली कानुनी व्यवसायी (lawyer) हायर गर्ने तयारी गरेको छ। साथै, संघकै कार्यसमितिबाट नियमित कर्मचारी खटाइने छन् भने सम्पूर्ण कार्यसमिति सेवा सहजीकरणमा सक्रिय भूमिका खेल्नेछ।
हेल्प डेस्कले निम्न समस्याहरूमा सहयोग पुर्याउनेछ:
• भाषागत समस्या
• कानुनी जटिलता
• स्वास्थ्यसम्बन्धी समस्या
• कार्यस्थलभित्र हुने विभेद वा दुर्घटना
• भिसा, अध्ययन तथा करियरसम्बन्धी परामर्श
• अन्य आवश्यक कानुनी प्रक्रिया र आवाजको सहारा
एनआरएनए कोरियाले आगामी दिनमा समाजसेवी, पत्रकार, संघसंस्था र विभिन्न पेशागत क्षेत्रका व्यक्तिहरूसँग सहकार्य गर्दै साझा मञ्चमा समन्वय गर्ने प्रतिबद्धता पनि व्यक्त गरेको छ।
यस ऐतिहासिक पहलमार्फत दक्षिण कोरियामा रहेका नेपाली समुदायको हक, अधिकार र समस्या समाधानमा एक नयाँ अध्याय सुरु भएको छ।
