बिशाल आवाज –पछिल्लो समय दक्षिण कोरियामा रोजगारी, अध्ययन वा व्यवसायका लागि बसोबास गरिरहेका नेपालीहरू पछिल्लो समय बैंक खाता खोल्नदेखि पैसाको कारोबारसम्ममा असहज स्थिति भोगिरहेका छन्। यसको प्रमुख कारण हो — नेपालको FATF ग्रे लिस्टमा परेको अवस्था।FATF (Financial Action Task Force) एक अन्तर्राष्ट्रिय संस्था हो, जसले मनी लाउन्डरिङ र आतंकवादको वित्तीय स्रोत नियन्त्रण गर्न नीति निर्माण गर्दछ। नेपाल सन् २०२४ मा ग्रे लिस्टमा परेपछि यसको असर विदेशमा रहेका लाखौं नेपालीहरूमा प्रत्यक्ष परेको छ।
विशेषगरी कोरियामा जहाँ बैंकहरूले अब नेपाली नागरिकहरूप्रति धेरै नै कडाइ गर्न थालेका छन्। खाता खोल्नका लागि सामान्य पासपोर्ट वा ID मात्र होइन, अब त तलब पर्ची, कामको कागजात, कर विवरणजस्ता धेरै प्रमाणहरू मागिन थालिएको छ। कतिपयले पैसा पठाउन खोज्दा ‘मूल देश उच्च जोखिममा परेको’ भन्दै रोकिने समस्या भोगेका छन्। कोही त यति पीडित छन् कि बैंकमा आफ्नो पैसा भए पनि झिक्न अप्ठ्यारो भइरहेको छ।
FATF ले नेपाललाई आवश्यक सुधार गर्न सन् २०२७ को फेब्रुअरीसम्मको समय दिएको छ। यो समयभित्र सरकारले आवश्यक कानुनी, आर्थिक र प्राविधिक सुधार गर्न सकेमा नेपाल फेरि विश्वसनीय मुलुकको सूचीमा फर्कन सक्छ। नत्र अझ गम्भीर प्रतिबन्ध वा नकारात्मक छविको सामना गर्नुपर्ने सम्भावना रहन्छ।
प्रवासमा बसेका नेपालीका लागि यो अवस्था निकै अप्ठ्यारो छ। उनीहरूले कुनै गल्ती नगरीपनि सजायको भागी बन्नु परिरहेको छ। तर आशा छ — नेपालले छिट्टै सुधारात्मक कदम चाल्नेछ, FATF को विश्वास जित्नेछ, र फेरि हाम्रा दाजुभाइ दिदीबहिनीहरूले कोरियामा सहज रूपमा बैंकिङ सेवा लिन सक्ने अवस्था आउनेछ।
यो केवल आर्थिक विषय होइन — प्रवासीको जीवनसँग गाँसिएको ठूलो प्रश्न हो।
