सउल, दक्षिण कोरिया — बीपिन गुरुङ नेतृत्वको गैर-आवासीय नेपाली संघ (NRNA-NCC) दक्षिण कोरियाले कोरियामा रहेका नेपाली श्रमिक, विद्यार्थी, उद्यमी र समग्र समुदायको हक, अधिकार र समृद्धिको पक्षमा केन्द्रित ‘८ बुँदे कार्ययोजना’ सार्वजनिक गरेका छन्।
सामाजिक न्याय, सांस्कृतिक समृद्धि, लगानी प्रवर्द्धन र दीर्घकालीन सुरक्षालाई समेट्दै उनले सार्वजनिक गरेका कार्यक्रमहरू प्रवासी जीवनमा सकारात्मक प्रभाव पार्ने विश्वास लिइएको छ।
🔷 मुख्य प्रतिबद्धताहरू यसप्रकार छन्:
१. श्रमिक–विद्यार्थी हेल्प डेस्क स्थापना
समस्या परेकालाई समन्वय, कानुनी सहयोग र सामाजिक परामर्श दिने ‘हेल्प डेस्क’ मार्फत पीडितको आवाज सम्बोधन गरिनेछ।
२. NRNA कप खेलकुद प्रतियोगिता
नेतृत्व विकास, सहकार्य र स्वास्थ्य सुदृढीकरणका लागि फुटबल, क्रिकेट, भलिबल, ब्याडमिन्टन लगायत खेल प्रतियोगिता आयोजना गरिनेछ।
३. हाइड्रोपावर लगानी सम्मेलन
नेपालको जलविद्युत् क्षेत्रमा प्रवासी लगानी प्रवर्द्धन गर्न कोरियामा उच्चस्तरीय सम्मेलन आयोजना गरिनेछ।
४. रेमिट्यान्स र सेयर बजार अभिमुखीकरण
श्रमिकहरूलाई सुरक्षित र लाभदायक आर्थिक अभ्यासका लागि वित्तीय साक्षरतामूलक कार्यक्रम गरिनेछ।
५. भव्य ‘नेपाल फेस्टिवल’ आयोजना
कोरियामा नेपाली कला, संस्कृति र पर्यटनको प्रवर्द्धन गर्दै दुवै देशबीचको सम्बन्ध सशक्त बनाइनेछ।
६. राष्ट्रिय पेन्सन (국민연금) मा पहुँचको पहल
कोरियाली पेन्सन सुविधाबाट नेपाली श्रमिकहरू पनि लाभान्वित हुने दिशामा कूटनीतिक संवाद अघि बढाइनेछ।
७. नेपाली राष्ट्रिय ध्वजावाहक उडानको पहल
नेपाल–कोरिया बीच नियमित उडान स्थापनाका लागि सरकारस्तरीय संवाद र सहकार्य गरिनेछ।
८. सामाजिक, शैक्षिक र स्वास्थ्य कार्यक्रमहरू
समुदायको आवश्यकता अनुसार उद्यमशीलता, शिक्षा र जनस्वास्थ्यसँग सम्बन्धित विभिन्न कार्यक्रम सञ्चालन गरिनेछ।
