कोरियाबाट फर्किएका नेपाली श्रमिकहरूको सीप, अनुभव र सोचलाई उद्यममा बदल्ने उद्देश्यले सउलमा आयोजित ‘नेपाल फर्केका नवप्रवर्तकहरू (Returnee Innovators for Nepal – RIN)’ कार्यक्रम सफलतापूर्वक सम्पन्न भएको छ।
दक्षिण कोरियाको विकास सहयोग संस्था KOICA को आर्थिक सहयोगमा सञ्चालित यो कार्यक्रम K-HaMi (Korea–Happy Migration) परियोजनाको एक महत्वपूर्ण अङ्ग हो। यसलाई KOICA र नेपाल सरकार, श्रम, रोजगार तथा सामाजिक सुरक्षा मन्त्रालयको सहकार्यमा संयुक्त रूपमा कार्यान्वयन गरिएको हो।
कार्यक्रमको मूल उद्देश्य भनेको दक्षिण कोरियाबाट नेपाल फर्किसकेका श्रमिकहरूलाई उद्यमशीलता, व्यवसायिक सीप र दीगो पुनःस्थापनातर्फ प्रेरित गर्नु हो। यसै सन्दर्भमा, RIN दोस्रो ब्याचमा सहभागी १० जना नेपाली श्रमिकहरूले आफ्ना व्यवसायिक योजना र सीपको जीवन्त प्रस्तुति दिएका थिए।
कार्यक्रममा कोरियास्थित नेपाली राजदूतावासकी महामहिम डा. शिवमाया तुम्बाहाङ्फे, श्रम काउन्सेलर मैया कडेल, KOICA प्रतिनिधि, साथै कोरियामा रहेका नेपाली व्यवसायीहरूको उल्लेखनीय उपस्थिति रहेको थियो ।
त्यस अवसरमा नेपाली सांस्कृतिक नृत्य, नेपाली स्वादका परिकार, र कोरियामा सक्रिय नेपाली व्यवसायीहरूको अनुभव आदान–प्रदानले कार्यक्रमलाई थप आकर्षक बनाएको थियो।
उक्त कार्यक्रमले केवल श्रमिकहरूको क्षमता प्रदर्शन मात्र होइन, प्रवासबाट फर्किएर आफ्नै देशमा रोजगारी सिर्जना गर्ने सपना बोकेका नवप्रवर्तकहरूलाई प्रेरणा र सम्भावनाको बाटो देखाएको छ।
