थेसो, दक्षिण कोरिया —
घरपरिवारदेखि टाढा, परदेशी भूमिमा पसिना बगाउने नेपाली चेलीहरूको भावना बोकेको नयाँ तीज गीत “मेरो त देशै माइती भयो” सार्वजनिक भएको छ। दक्षिण कोरियाको थेसोमा छायांकन गरिएको यस गीतले प्रवासी जीवनको वास्तविकता र तीज पर्वप्रतिको आत्मीय सम्बन्धलाई मार्मिक शैलीमा उतारेको छ।
गीतका सर्जक दिवस तिवारी हुन्, जसले शब्द र संगीत दुवै भरेका छन्। पूर्णकला बिसीको भावनात्मक स्वरले गीतलाई थप सजीव बनाएको छ। एरेन्जर रमेश सेन्चुरी, रेकर्डिङ/मिक्सिङमा सुरज भुसालको योगदान छ।
दृश्य प्रस्तुतिमा निर्देशक सोनम पराजुलीले संवेदना मिसिएको कथा प्रस्तुत गरेका छन्। भिडियोमा प्रमिला भट्टराई र शोनीप विक्रम शाहीको अभिनय छ भने निकिता थापा, दीपिका थापा र प्रीति पाण्डेले लोकभावमा सजिएको नृत्य प्रस्तुत गरेका छन्। समग्र व्यवस्थापन जनक भट्टराईले सम्हालेका छन्।
गीत Bharat Chettri युट्युब च्यानलबाट सार्वजनिक गरिएको हो।
“मेरो त देशै माइती भयो” गीतले तीजलाई केवल पर्वका रूपमा होइन, नेपाली नारीको आत्मिक यात्राको प्रतीकका रूपमा चित्रण गर्छ। परदेशमा टाढा बसेका नेपालीहरूको भित्री अभिव्यक्तिलाई यो गीतले स्वर, शब्द र दृश्यमा सशक्त ढंगले बोलेको छ।
नेपाली कला र संस्कृतिको प्रवासमै संरक्षण गर्दै, गीतले हर्ष र बिछोडको गहिरो सन्देश दर्शकसम्म पुर्याउने अपेक्षा गरिएको छ।
Video: https://youtu.be/CIQjoH-uVz0?si=ElR0J4VRAOAnbLsw
