द. कोरिया सउल – नेपाल मुक्तक प्रतिष्ठानले कोरियामा बृहत साहित्य मेला सम्पन्न गरेको छ । शनिबार दोङ्देमुनमा कविता, गजल, मुक्तक र हाइकुलाई बिशेष वाचन सहित कार्यक्रम गरेको हो ।
बिशेष कविको रूपमा उपस्थित सिद्धान्त गौतम (कलमकार) ले आफ्ना ४ वटा कविता सुनाए । बिशेष गजलकारहरू राधेश आचार्य र सुधाकर दाहालले आ-आफ्ना आधा/आधा दर्जन गजलहरू प्रस्तुत गरे । मुक्तक लागि पनि कविता र गजलजस्तै ह्यारी बोण्ड र तिल्ता मगरले आफ्ना एक एक दर्जन मुक्तकहरू सुनाए । त्यस्तै कवि डिइबी सिकारुले पनि आफ्ना दर्जनभन्दा बढी हाइकुहरू सुनाए ।
कार्यक्रममा प्रचण्ड सापकोटा, दीपक स्पन्दन, रुसन सुवेदी, सञ्जय, जीवन भण्डारी, रुद्र कँडेल लगायतले पनि आआफ्ना कविता, गजल, मुक्तकहरू सुनाए ।
नेपाल मुक्तक प्रतिष्ठानका अध्यक्ष निर्दोष सभापति रहेको यस कार्यक्रममा नेपाली दुतावासका द्वितीय सचिव जेनिम अधिकारी प्रमुख अतिथिका रूपमा थिए । कार्यक्रमका संयोजक संस्थाका वरिष्ठ उपाध्यक्ष दिपक राज भएको यस कार्यक्रमको सञ्चालन संस्थाका महासचिव आरपिसी सङ्गमले गरेका थिए । अन्तर्राष्ट्रिय नेपाली साहित्य समाज कोरियाका वरिष्ठ उपाध्यक्ष रामचन्द्र शर्मा , पुर्व सचिव एवम् सल्लाहकार विष्णु वाग्ले, आदीवासी जनजाति साहित्य महासंघका विष्णु सन्यास, एमटियु का अध्यक्ष उदय राई, गुल्मी सम्पर्क समितिका अध्यक्ष जीवन न्यौपाने लगायतको उपस्थिती थियो ।
कार्यक्रममा बिशेष कविहरू, गजलकारहरू र मुक्तककारहरूलाई कार्यक्रममा उपस्थित भई रचना सुनाउनुका साथै प्रवासमा बसेर नेपाली भाषा साहित्यको श्रृविद्धीका लागि योगदान दिएको भन्दै खादा लगाई सम्मान गर्दै सम्मान पत्र समेत प्रदान गरेको थियो ।
कार्यक्रममा मुक्तकालय नेपालकी अध्यक्ष निलाञ्जला भारद्वाजको मुक्तक सङ्ग्रह निलाञ्जला; साहित्यकार भोजराज घिमिरेको गजल सङ्ग्रह नाद; गजलकार कुशल नाथ योगीको गजल सङ्ग्रह कोहिनूर लगायतका अन्य केही पुस्तकहरू समेत बिमोचन गरिएको थियो ।
