आफूलाई कोरियन लाहुरे भन्दै डिपेन्डेन्ट भिसामा लैजाने प्रलोभन देखाएर ठगी गरेको आरोपमा एक जना पक्राउ परेका छन् । पक्राउ पर्नेमा रामेछाप घर भई हाल भक्तपुर बस्दै आएका ३५ वर्षीय साजन मगर भन्ने होमबहादुर मगर रहेका छन् । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले मगरलाई शुक्रबार भक्तपुरबाट नियन्त्रणमा लिएको हो ।
कार्यालयका प्रवक्ता प्रहरी उपरीक्षक काजीकुमार आचार्यका अनुसार दुई महिलाले ठगीमा परेको उजुरी दिएका थिए । पीडितका अनुसार साजन मगर सबैभन्दा पहिले सामाजिक सञ्जाल फेसबुकमार्फत महिलाहरूसँग जोडिएका थिए । उनले आफूलाई कोरियन लाहुरे भन्दै बिदामा नेपाल आएको बताउँथे । त्यसपछि प्रेम सम्बन्ध अगाडि बढाई बिहे गरेर डिपेन्डेन्टमा लैजाने भनी विभिन्न बहानामा रकम जम्मा गर्न लगाए ।
रकम पाएर फरार भएको थाहा पाएपछि पीडित युवतीहरू कार्यालयमा उजुरी दिन पुगेका थिए । यसपछि अनुसन्धान गर्दै जाँदा मगरको संलग्नता भेटिएको प्रहरी उपरीक्षक आचार्यले बताए ।
मगरले दुई महिलाबाट २१ लाख रुपैयाँ बढी रकम ठगी गरेको अनुसन्धानबाट खुलेको छ । उनीमाथि ठगी सम्बन्धी कसुरमा थप अनुसन्धान गर्न जिल्ला प्रहरी परिसर भद्रकाली पठाइएको छ ।
Techpana वाट
