दक्षिण कोरियाको बुसानमा जुलाई १३ र १४ तारिख सम्पन्न १६औँ कोरियन ओपन अन्तर्राष्ट्रिय कराँते डो च्याम्पियनसिपमा नेपाली खेलाडी अनिल थोकरले एक स्वर्ण र जमानसिंह गुरुङले दुई रजत पदक जितेका छन् ।
प्रतियोगितामा नेपाली खेलाडी अनिल थोकरले पुरुषतर्फको ५२ केजीभन्दा मुनिको तौलसमूहमा स्वर्ण पदक जितेका हुन् भने जमानसिंह गुरुङले दुईवटा रजत पदक जितेका हुन् । गुरुङले पुरुषतर्फको सिनियर एकल काता र कुमुतेतर्फ ७५ केजीभन्दा मुनिको तौलसमूहमा फाइनलमा फिलिपिन्सका खेलाडीसँग पराजित भइ रजत पदक जितेका हुन्। निकै प्रतिस्पर्धात्मक भएको फाइनलमा फिलिपिन्सका खेलाडीसँग ५/५ स्कोरमा सेन्सुले पराजित भएका थिए ।
मर्स्याङ्दी ४ सिलढुङ्गा लम्जुङका गुरुङ वैदेशीक रोजगारीको सिलशिलामा हाल कोरियामै रहेका छन् । उनले कोरियामै कराँते र किक बक्सिङको प्रशिक्षण गर्दै आएका छन् । साथै गुरुङले हालसम्म कोरिया, सिङ्गापुर ,मलेसिया, फिलिपिन्स ,थाइल्याण्ड र इन्डिया गरी ८ भन्दा बढी देशमा गई अन्तर्राष्ट्रिय मेडलहरू प्राप्त गरिसकेका छन्।
प्रतियोगितामा नेपालबाट दुईजना रेफ्री पनि सहभागिता जनाएका थिए । महेश महर्जन र चित्रबहादुर श्रेष्ठले प्रतियोगितामा रेफ्रीको भूमिका निर्वाह गरेका थिए ।
प्रतियोगितामा आयोजक दक्षिण कोरिया, नेपाल, हङ्कङ, फिलिपिन्स, इन्डोनेसिया, मलेसिया, क्यानडा, पाकिस्तान, कजाकस्तान, उज्बेकिस्तान र भारतका खेलाडीको सहभागिता रहेको थियो ।
