बोम्जन गुरुङ/ बिशाल आवाज:कोरियन नयाँ वर्ष सलनाल २०२४ को अवसर पारेर आयोजना गरिएको “स्याङ्जा बुसान सांगीतिक धमाका” को आयव्यय विवरण सार्वजनिक गरिएको छ ।
आयोजक स्याङ्जा परिवार किम्हे बुसान शाखा सम्बद्ध कार्यसमिति, सल्लाहकारहरु, विभिन्न विभागीय प्रमुखहरुको भेलाद्धारा कार्यक्रमको समीक्षा बैठक बसी संस्थाले करिब पौने तीन करोड वोन अर्थात् २ करोड ६१ लाख ३७ हजार ५ सय ५७ कोरियन वोन वचत भएको जानकारी दिँदै आयव्यय सार्वजनिक गरेको हो ।
“परदेशीको हातेमालो, ग्रामीण शिक्षामा उज्यालो” भन्ने मूल नारासँगै किम्हे स्थितको सुविधा सम्पन्न Eunseok Cultural and Walfare हलमा सभ्य र भव्य रुपमा सम्पन्न भएको उक्त कार्यक्रममा नेपालबाट चर्चित राष्ट्रिय कलाकारहरु र स्थानीय कलाकारहरुको बेजोड प्रस्तुति रहेको थियो । कार्यक्रममा विभिन्न शिर्षकमा भएको कूल आम्दानी ५ करोड ३० लाख २२ हजार ४ सय १७ कोरियन वोन र खर्च २ करोड ६८ लाख ८४ हजार ८ सय ६० वोन घटाएर २ करोड ६१ लाख ३७ हजार ५ सय ५७ कोरियन वोन (उठ्न बाँकी १२ लाख ७ हजार कोरियन वोन सहित) वचत भएको हो ।
कार्यक्रमको उद्धेश्य अनुरुप संस्थाको आन्तरिक गृहकार्य भइरहेको र यसलाई यथाशीघ्र कार्यान्वयनमा ल्याइने आयोजक संस्थाका अध्यक्ष आशिष रानाभाटले बताएका छन् । “स्याङ्जा बुसान सांगीतिक धमाका” कार्यक्रमलाई सफल बनाउन आर्थिक, नैतिक र भौतिक सहयोग गर्ने सम्पूर्ण संघ-संस्था, सहयोगीदातालाई आयोजक स्याङ्जा परिवार किम्हे बुसान शाखा दक्षिण कोरियाले हार्दिक धन्यवाद व्यक्त गरेको छ ।
