नेपाल मगर संघ, गणतन्त्र कोरिया किम्हे/बुसान शाखाको मुख्य व्यवस्थापनमा दक्षिण कोरियामा भव्य रूपमा भूमे (भूम्या) पूजा तथा वृहत वनभोज कार्यक्रम–२०२६ आयोजना हुने भएको छ ।
“भाषा, धर्म र संस्कृति नेपालीहरूको विविधता, विविधतालाई बचाई राख्ने हाम्रो गौरवपूर्ण मौलिकता” भन्ने मूल नाराका साथ आयोजना हुने उक्त कार्यक्रम नेपाल मगर संघ दक्षिण कोरिया केन्द्र, थेगु शाखा, जेजु शाखा, मोक्पो–छल्लादो शाखा, DSME मगर समाज गजेदो तथा अठार मगरात खाम भाषी सम्पर्क मञ्च दक्षिण कोरियाको संयुक्त आयोजनामा सम्पन्न हुन लागेको हो ।
आयोजकका अनुसार कार्यक्रम आगामी जुन १३ र १४ (२०२६) मा 경남 창녕군 부곡면 온천로 594 (इल्सुङ कोंडो) मा सञ्चालन हुनेछ । कार्यक्रममा कोरियामा बसोबास गर्ने सम्पूर्ण नेपाली दाजुभाइ तथा दिदीबहिनीहरूलाई उपस्थित भई भेटघाट, सांस्कृतिक आदानप्रदान तथा मनोरञ्जनमा सहभागी हुन हार्दिक निमन्त्रणा गरिएको छ । कार्यक्रमलाई थप सहज बनाउन कोरियाका विभिन्न शहरहरूबाट आवत–जावतका लागि बसको व्यवस्था समेत गरिएको आयोजकले जनाएको छ ।
साथै सहभागी हुन इच्छुक व्यक्तिहरूले नामावली दर्ताका लागि तोकिएका सम्बन्धित व्यक्तिसँग सम्पर्क गर्न अनुरोध गरिएको छ । यस कार्यक्रमले कोरियामा रहेका नेपाली समुदायबीच भाषा, धर्म र संस्कृतिको संरक्षण तथा आपसी सद्भाव अझ मजबुत बनाउने अपेक्षा गरिएको छ ।
